Құсайынов Тиыштықбай – гидротехникалық құрылымдар және жер асты коммуникациялар цехының экскаватор-тиегіш машинисі. Жас энергетикті Тәуелсіздіктің құрдасы болудың қандай екенін сұрап, әңгімеге тартқан едік.
?Тәуелсіздік күні құтты болсын! Сіз бұл мерекені қалай түсініп, қабылдайсыз?
– Менің дәл қазір, дәл осы жерде сізбен жарқын жүзбен, ешбір қайғы-мұңсыз сұхбаттасып отырғаным – тәуелсіздіктің арқасы. Әйтпесе, ғасырлар бойы қазақтың көзінен жас құрғап па еді, көңілі марқайып па еді?! Демек, тірегіміз – Тәуелсіздік болғандықтан, бұл күн 365 күннің ең ардақтысы. Әрине, жаныма ең жақын мереке ретінде қабылдаймын.
?Тәуелсіздік сіздің буынға не берді?
– Қазіргі жастар шын патриот. Мұның өзі тәуелсіздіктің жемісі. Отанын сүйген жастар үнемі елін-жерін көркейту үшін білім іздеп, жаңалыққа ұмтылады. Ал біздің елде ондай жастарға зор мүмкіндіктер берілген. Оқимын, тоқимын, еңбек етіп, еліме қызмет қыламын деген жастың жолына бөгет жоқ. Мұнан артық не керек? Жастарға сеніңіздер, болашақ жастардың қолында.
?Тәуелсіздік мерекесін қалай атап өтесіз?
– Ең алдымен туыс-туған, жора-жолдастарымды ешбірін қалдырмай түгендеп, құттықтап шығамын. Үйде арнайы мерекелік дастархан жаятынымыз айтпаса да түсінікті. Достарымыз, туыстарымыз құттықтап келеді. Және жыл сайын біз жолдастарымызбен Тәуелсіздік күніне орай воллейболдан достық жарыс өткіземіз. Әр жылы жағдайларға байланысты әр түрлі атап өтеміз.
?Энергетика саласын неге таңдадыңыз?
– Бала күнімнен техникаға құмармын. Бірақ, қызық болғанда алғашында полиция қызметкері болдым. Онда көп жүре алмадым. Жүрек қалауым энергетика, техника саласы екені түсіндім. Бір шешім қабылдап Екібастұз ГРЭС-2-ге 2019 жылы қараша айында экскаватор-тиегіш машинисі болып жұмысқа кірдім. Өз басым энергетика саласынан өзім үшін өте үлкен мүмкіндіктерді көремін. Әріптестерім – Балтабаев Рауан, Құдабаев Айдын, Саткеев Бейсенбек, Мақтаев Сағидоллаға үлкен алғысымды білдіремін. Алғашқы күннен бастап маған қолдаушы болып, бағыт-бағдар беріп келеді. Қазіргі жұмысым – жерасты құбырларын жөндеп қалпына келтіретін әріптестеріме экскаватормен техникалық қолдау көрсету. Станция өз қызметкерлеріне әрдайым лайықты жағдай жасап отырады екен. Маған ол да өте ұнайды. ГРЭС-2 станциясын тандағаныма еш өкінбеймін!
?Алға қойған мақсаттарыңыз бар шығар?
– Әрине. Қазір жастар техникаға аса қызықпайтын болып жүр. Шын мәнінде бұл сала әлемде қарыштап дамып жатыр. Өзіміз өндіре алмасақ та, жұрт өндірген супер техникаларды ешбір қиындықсыз меңгеріп, игеріп, пайдалана алатын жастар өсуі керек. Солар ертең жаңалық ашатын болады. Арманым – сондай жастардың өсіп шығуына ықпал ету.
?Мерекелік тілегіңізді тыңдайық…
– Тәуелсіздіктің туы жығылмасын. Әрқашан биікте желбірей берсін. Ауырмаңыздар, еңбекте биік белестерден көріне берініздер. Әлемге аты шығып, еліміздің ең озық энергия өндіру кешені болған біздің ұжым дами берсін. Тәуелсіздіктің қадіріне жетіп, ел үшін қызмет етейік.
?Әңгімеңізге рахмет!
