«Екібастұз ГРЭС-2 станциясы» АҚ Солнечный кентінің әкімдігімен бірлесе отырып, қасиетті Рамазан айында ораза тұтып, ниет еткен станция қызметкерлері мен кент тұрғындарына ауызашар ұйымдастырды.
Ауызашар уақытында уағыз-насихат айтылып, асыл дініміздің амалдары хақында ой салар әңгімелер сөз етілді.
Кент мешітінің имамы Рамазан айы кешірім мен сабырлылық үндейтін, қайырымдылықты молынан жасайтын ең қайырлы ай екенін айтып, күллі мұсылман баласы қуана күтіп, құрметпен қарайтынын жеткізді. Жақсылықты жарыса жасап, сауапқа кенелетін мұсылман қауымы үшін амалдарын арттыратын ай екенін, осынау қасиетті айда ораза тұтқан барша жанға ниеттерінің қабыл болуына тілектес екенін білдірді.
Жалпы ораза ұстаған жамағатқа ауызашар беріп, сауапты іс атқарып, рухани жиын ұйымдастырылғаны үшін келген жұрт ризашылықтарын айтып, кент қариялары ақ батасын берді.
